Црковно-народниот собир во Црквата „Св. Кирил и Методиј“ во Стајковци
Вечерва имавме чест да присуствуваме на црковно-народниот собир што се одржа во Црквата „Св. Кирил и Методиј“ во населеното место Стајковци, по повод празникот на светите браќа – заштитници на словенската писменост, култура и духовност, како и патрони на ова населено место.
Овој настан претставува длабоко вкоренета традиција што го обединува народот, ги зближува генерациите и потсетува на вредностите што нѐ држат заедно како заедница – верата, културата и почитта кон корените. Црквата вечерва беше центар на духовноста и собиралиште на луѓе со отворено срце и љубов кон своето место.
Собирот беше исполнет со молитва, народна музика, топлина и заедништво, а духовната радост што се чувствуваше меѓу присутните сведочи за силната поврзаност на жителите со својата традиција и своите свети заштитници.
Општина Гази Баба, со особено внимание и почит го поддржува ваквиот вид на настани, кои го негуваат духовниот и културен идентитет на населените места.
Св. Кирил и Методиј се симбол на знаење, мисионерска сила и просветителство – вредности што се од исклучително значење и за современото општество.
Им ја честитаме слава на сите жители на Стајковци и им посакуваме здравје, благосостојба и уште многу вакви собири во духот на заедништвото и традицијата. Нека нивната заштита и благослов го чуваат ова населено место и понатаму.
