Петровденски чествувања во Јурумлери – со песна, оро и македонска гордост!
Во духот на вековната традиција и силната духовна поврзаност со православната вера, во населеното место Јурумлери се одржа манифестацијата „Петровденски чествувања“, по повод големиот христијански празник Свети апостоли Петар и Павле – Петровден.
Под ведро македонско небо, со радост во срцето и љубов кон корените, жителите на Јурумлери и бројните гости уште еднаш ја потврдија живоста на нашата народна традиција – со песна, оро и искрена народна веселба.
На сцената настапија познатите имиња од македонската музичка сцена – Спасен Силјановски, Миле Кузмановски, како и младата и талентирана Бојана Михајловиќ, жителка на Јурумлери, која со својот глас и настап внесе посебна емоција и гордост во оваа празнична вечер.
Петровден е празник кој не само што ја слави христијанската вера и мисијата на светите апостоли, туку и ја обединува заедницата околу духовни и културни вредности што се пренесуваат од колено на колено. Тој е симбол на цврстината на верата, заедништвото и љубовта кон родната земја и обичаите.
Овие чествувања се доказ дека Јурумлери не само што ја негува македонската традиција, туку и ја оживува, пренесувајќи ја на младите генерации – преку песната, преку игрите, преку заедничката радост.
Голема благодарност до сите кои беа дел од оваа прекрасна вечер исполнета со љубов, гордост и почит кон она што сме – Македонци со душа, историја и иднина.
