СВЕЧЕНА СЕДНИЦА ЗА 50 ГОДИНИ ОПШТИНА ГАЗИ БАБА – ПОЛОВИНА ВЕК ИСТОРИЈА, ЗАЕДНИШТВО И УСПЕСИ!

Со свечена седница на Советот на Општина Гази Баба започна централното одбележување на големиот јубилеј – 50 години од основањето на нашата општина.

Половина век постоење значи пет децении развој, посветеност, предизвици, успеси и генерации граѓани кои со својот труд и ангажман ја создавале Гази Баба каква што е денес. Овој значаен јубилеј е можност да се потсетиме на нашето минато, да ги вреднуваме постигнатите резултати, но пред сè, да ја потврдиме нашата определба за уште подобра иднина.

 

Во обраќањето на градоначалникот Бобан Стефковски пред членовите на Советот, присутните гости и учениците, упати порака дека на Гази Баба ѝ е потребен конструктивен дијалог, меѓусебно почитување и одговорност од сите политички чинители. Не затоа што треба да размислуваме исто, ниту затоа што треба да се согласуваме за секое прашање, туку затоа што, и покрај сите наши разлики, мораме да бидеме свесни дека имаме заедничка обврска – да работиме во интерес на граѓаните и за доброто на општината.

 

Неопходно јасно треба да ја поставиме границата меѓу политичката борба и јавниот интерес. Политичките разлики се составен дел од демократското општество, но тие никогаш не смеат да бидат пречка за реализација на проекти, решавање на проблемите и подобрување на квалитетот на живот на граѓаните.

Политиката мора да застане онаму каде што започнуваат потребите на граѓаните. Тоа е принципот од кој треба да тргнуваме сите, затоа што интересот на Гази Баба мора секогаш да биде над партиските интереси.

 

Посебна чест и задоволство беше присуството на 55 ученици, кои се добитници на стипендии од Општина Гази Баба. Нивното присуство на оваа свечена седница е потврда дека иднината на нашата општина е во рацете на младите, талентирани и посветени генерации.

 

На учениците Стефковски им упати порака дека овие стипендии не се само финансиска поддршка, туку пред сè признание за нивниот досегашен труд, постигнатите резултати и вложениот напор. Тие се и поттик и охрабрување за сите успеси што допрва ги очекуваат.

 

Талентот е дарба, но вистинскиот успех доаѓа тогаш кога тој се надополнува со работа, дисциплина, љубопитност и истрајност. Нашата обврска е да создаваме услови во кои вашите знаења, способности и потенцијали ќе можат да дојдат до полн израз.

 

На свечената седница присуствуваа и претседателот на Собранието на Република Македонија, Африм Гаши, како и пратениците Жаклина Пешевска, Зоран Коцевски и Дијана Илиевска, со чие присуство беше дадено дополнително значење на овој значаен општински јубилеј.

 

Педесет години Гази Баба се пет децении исполнети со приказни, луѓе, труд, посветеност и заеднички достигнувања. Јубилејот не е само потсетување на она што сме го постигнале, туку и обврска да продолжиме да создаваме општина со повеќе можности, подобри услови за живот и сигурна иднина за сите.

 

50 години Гази Баба – со почит кон минатото, одговорност во сегашноста и визија за иднината!