Седница на Комисијата за социјална заштита и инклузија на ЗЕЛС
Во просториите на ЗЕЛС во присуство на заменик министерот Ѓоко Велковски и претседателот на ЗЕЛС Орце Ѓорѓиевски, се одржа седница на Комисијата за социјална заштита и социјална инклузија. Седницата беше фокусирана на прашањето за децентрализација на надлежностите на Центрите за социјална работа, како дел од поширокиот процес на унапредување на социјалните услуги на локално ниво.
На седницата беа презентирани неколку концепти и предлог-модели за пренос на одредени надлежности од Централната власт кон општините, со цел поголема ефикасност, флексибилност и прилагоденост на социјалните услуги кон потребите на локалното население. Презентациите беа проследени со активна дискусија меѓу членовите на Комисијата, претставниците на општините и експерти од областа на социјалната заштита.
Членовите на Комисијата ја нагласија важноста од јасно дефинирани надлежности, финансиска одржливост на процесот, како и потребата од континуирана обука и поддршка на кадарот кој ќе ги извршува новите надлежности на локално ниво. Посебен акцент беше ставен на улогата на општините во идентификација на социјални ризици и во развој на услуги што ќе бидат блиску до граѓаните и прилагодени на реалните локални потреби.
Комисијата при ЗЕЛС ќе продолжи со координација на процесот на консултации помеѓу општините, Министерството за социјална политика, демографија и млади и другите засегнати страни, со цел креирање на модел кој ќе биде функционален, одржлив и усогласен со стратешките цели на реформата во социјалната заштита.
