Pаботна средба со тимот на проектот „ЕУ поддршка за воспоставување на регионален систем за управување со отпад во Скопскиот регион“
Денес градоначалникот Бобан Стефковски заедно со директорот на ЈКП „Гази Баба 2007“ и раководители од општинската администрација одржаа работна средба со тимот на проектот „ЕУ поддршка за воспоставување на регионален систем за управување со отпад во Скопскиот регион“, предводен од раководителот на проектот, г-ѓа Марина Илиќ.
Разговараа за актуелната состојба во управувањето со комуналниот отпад на територијата на Општина Гази Баба, како и за активностите кои ќе придонесат кон воспоставување на современ, ефикасен и одржлив систем за управување со отпад.
Овој значаен проект се реализира со поддршка на Европската Унија преку ИПА III програмата, во соработка со Министерството за животна средина и просторно планирање, Скопскиот плански регион, Град Скопје, општините и јавните комунални претпријатија.
Во рамки на теренските активности беа разгледани локации поврзани со собирање, транспорт и управување со отпад, како и локации на диви депонии кои во иднина ќе бидат опфатени со активности за санација и ревитализација.
Тригодишната имплементација на проектот претставува важен чекор кон подигнување на еколошките стандарди, зајакнување на институционалните капацитети и развој на современ регионален систем за управување со отпад.
Продолжуваме со конкретни активности за почиста, поуредена и поеколошка Гази Баба.
Грижата за животната средина е инвестиција во иднината и во поквалитетен живот за сите наши граѓани.
