Градиме мостови на соработка, ги негуваме заедничките вредности и создаваме можности за иднината

Денес, во просториите на Општина Гази Баба, потпишавме Меморандум за соработка со Здружението на Македонци по потекло од Албанија „ЗОШТО“, со што поставуваме уште една важна основа за продлабочување на партнерството и заедничкото делување.

Овој Меморандум претставува рамка за заедничка соработка, поддршка и партнерство во повеќе значајни области – образованието, културата, социјалната интеграција, традицијата, зачувувањето и промоцијата на културното наследство, како и реализацијата на заеднички локални иницијативи кои ќе бидат во интерес на граѓаните.

Нашето културно наследство, традициите и вредностите кои ги носиме со себе се богатство кое треба да го чуваме, негуваме и пренесуваме на идните генерации. Токму затоа, ваквите партнерства се од особено значење – затоа што преку нив создаваме простор за поврзување, размена на искуства, нови идеи и конкретни активности.

Особено ми е драго што преку оваа соработка отвораме можност за поддршка на младите, унапредување на образовните и културните активности, афирмација на традицијата и зачувување на културното наследство, но и за создавање нови иницијативи кои ќе ги поврзуваат граѓаните и ќе придонесуваат кон посилна и поинтегрирана локална заедница.

Верувам дека вистинските резултати се постигнуваат тогаш кога институциите, здруженијата и граѓаните работат заедно, со јасна цел и со взаемна почит. Овој Меморандум не го гледаме само како формален документ, туку како почеток на една конкретна и долгорочна соработка, исполнета со идеи, активности и проекти.

Од Општина Гази Баба продолжуваме да создаваме партнерства со сите кои имаат желба да придонесат кон развојот на нашата заедница, да ја збогатат културната и општествената понуда и да создадат нови можности за граѓаните.

Затоа што различностите нè збогатуваат, традицијата нè поврзува, а заедничката работа нè движи напред.

Продолжуваме заедно – со почит кон минатото, со грижа за сегашноста и со визија за иднината.