Директорот на БЈБ Александар Јанев во работна посета на Општина Гази Баба
Денес градоначалникот Бобан Стефковски имаше средба со директорот на Бирото за јавна безбедност, Александар Јанев.
На средбата разговараа за безбедносната состојба во Општина Гази Баба, актуелните предизвици и мерките што заеднички ги преземаме за унапредување на сигурноста и квалитетот на живот на нашите граѓани.
Посебен акцент ставија на безбедноста во училиштата, заштитата на учениците и создавањето безбедна и здрава средина за нивен раст и развој.
Разговараа и за предизвиците поврзани со врсничкото насилство, при што се согласија дека превенцијата, едукацијата и навременото институционално делување се клучни во справувањето со оваа појава.
Безбедноста не е обврска само на институциите, туку заедничка одговорност на целото општество. Затоа, преку координирана соработка помеѓу локалната самоуправа, полицијата, училиштата, родителите и граѓаните, продолжуваме да градиме средина во која секое дете ќе се чувствува сигурно, а секој граѓанин заштитено.
Во знак на благодарност за успешната и континуирана соработка помеѓу Бирото за јавна безбедност и Општина Гази Баба, директорот Александар Јанев му додели пригодна плакета на градоначалникот Бобан Стефковски. Ова е признание и потврда за заедничката посветеност, меѓусебната доверба и искрената заложба за создавање побезбедна и посигурна општина за сите наши сограѓани.
Продолжуваме заедно, одговорно и посветено, во интерес на граѓаните на Гази Баба.
