Врз основа на член 50 став (1) точка 4 од Законот за локалната самоуправа (”Службен весник на РМ” бр.5/02 и ”Службен весник на РСМ” бр.202/24) и точка 8 од Програмата за заштита на животната средина и природата на Општина Гази Баба за 2025 година (”Службен гласник на Општина Гази Баба” бр.24/24), Градоначалникот на Општина Гази Баба објавува:
ЕКОЛОШКИ КОНКУРС
“Денови на пролетта – Денови на екологијата”
за избор на
1. Најеколошка компанија (компанија со успешна примена на еколошки стандарди и особен придонес кон зачувување на животната средина на територија на општина Гази Баба).
2. Најголем придонес во областа на животната средина (правни и/или физички лица кои со своја активност и залагање сториле најмногу за зачувување и унапредување на животната средина во општина Гази Баба преку заштита на медиумите и областите на животната средина, користење на обновливи извори на енергија и слично). Во предвид ќе се земат активости кои се реализирале на територија на општината Гази Баба.
3. Најубаво уреден двор на објект за инвидуално домување на територија на општина Гази Баба.
4. Најубаво уреден двор на објект за колективно домување на територија на општина Гази Баба.
5. Најубав состав/расказ/стихотворба на тема екологија за ученици од основните училишта во општина Гази Баба; и тоа од 1во – 5то одделение.
6. Најубав состав/расказ/стихотворба на тема екологија за ученици од основните училишта во општина Гази Баба; и тоа од 6 то – 9то одделение.
7. Најубав цртеж на тема екологија за ученици од основните училишта во општина Гази Баба; и тоа од 1во – 5 то одделение.
8. Најубав цртеж на тема екологија за ученици од основните училишта во општина Гази Баба; и тоа од 6 то – 9то одделение.
9. Најубав цртеж на тема екологија за деца од градинките во општина Гази Баба.
Пријавите на заинтересираните граѓани, невладини организации, претпријатија и други правни и физички лица треба се достават директно во архивата на Општина Гази Баба или по пошта, на адреса: Општина Гази Баба – Сектор за заштита на животната средина и природата, ул.„Архимедова “ бр.2, со назнака: Еколошки конкурс “Денови на пролетта – Денови на екологијата”, со задолжително запишување на редниот број и целосното име на категоријата на награда за која се пријавуваат.
За првите две категории, предвидена е по една награда во износ од по 50.000,00 денари.
За третата и четвртата категорија “најубаво уреден двор”, предвидени се две награди (инвидуално домување и колективно домување), во износ од по 45.000,00 денари.
За петтата, шестата, седмата, осмата и деветтата категорија се предвидени по три награди во вкупен износ од 21.110,00 денари по категорија (прва награда 10.000,00 денари, втора награда 6.000,00 денари и трета награда 3.000,00 денари).
Разгледувањето на пристигнатите пријави и одбирањето на кандидатите ќе го врши соодветна комисија, која Градоначалникот на Општина Гази Баба ќе ја формира од претставници на вработените во општинската администрација.
Рокот за пријавувањето започнува од денот на објавување на Јавниот повик и трае до 16 мај 2025 година.
Прогласувањето на добитниците во сите категории ќе се одржи на 05 Јуни 2025 година, во рамките на одбележувањето на Светскиот ден за заштита на животната средина, од страна на Градоначалникот на Општина Гази Баба.