НОВА КАТНА ГАРАЖА ВО ПИВАРА СКОПЈЕ: 400 НОВИ ПАРКИНГ МЕСТА ЗА ВРАБОТЕНИТЕ
Денес, на покана на генералниот директор на Пивара Скопје, Огњен Лазиќ, градоначалникот Бобан Стефковски ја посети компанијата и присуствуваше на пуштањето во употреба на новата катна паркинг гаража.
Станува збор за значајна инвестиција вредна 2,8 милиони евра, со која се обезбедуваат повеќе од 400 паркинг места за вработените и значително се подобрува пристапноста, безбедноста и сообраќајната организација во рамки на производствениот комплекс.
Градоначалникот на Општина Гази Баба, истакна дека уште од првиот ден од неговиот мандат јасно го застапува ставот дека големите индустриски капацитети во Автокоманда треба да преземат одговорност и да обезбедат сопствени паркинг-простори за своите вработени.
Со години наназад голем број возила се паркираа низ улиците и јавните површини во населбата Автокоманда, што дополнително го оптоваруваше сообраќајот и го отежнуваше секојдневното живеење на граѓаните.
Задоволни сме што оваа инвестиција на Пивара Скопје значи конкретно решение – вработените добиваат обезбеден паркинг, а населбата добива помал сообраќаен притисок.
Но, ова е само почеток и останатите индустриски капацитети во Автокоманда треба да инвестираат во сопствени паркинг-простори. Тоа не е само прашање на комфор, туку и прашање на одговорност кон граѓаните и средината во која работат.
При посетата Бобан Стефковски имаше можност да разгледа повеќе објекти на Пивара Скопје, да се запознае со начинот на работа, производствените процеси и богатата историја на компанијата.
Ваквите инвестиции се доказ дека успешниот бизнис и успешната локална самоуправа треба да се движат во иста насока – со инвестиции, одговорност и партнерство.
Бизнис-заедницата е исклучително важен партнер за локалниот економски развој. Кога компаниите инвестираат, се развиваат и ги унапредуваат условите за работа, придобивка има целата општина.
Општина Гази Баба и во иднина ќе продолжи да гради отворен, партнерски и конструктивен однос со бизнис-заедницата, но и да инсистира на одговорно работење и решенија кои носат корист за граѓаните.
Инвестициите на компаниите треба да значат подобри услови не само за вработените, туку и за заедницата во која функционираат.
