ЖЕНСКИ ФУДБАЛ НА ТЕРЕНОТ ДЕНЕС!
Општина Гази Баба е општина што верува во потенцијалот, храброста и силата на секое девојче!
Денес бевме домаќини на настан посветен на имплементацијата на проектот „Женска фудбалска кампања“, организиран од Фудбалската федерација на Македонија и ФИФА, со јасна цел – да го доближиме фудбалот до девојчињата и да ги охрабриме да ги направат своите први чекори на зелениот терен.
Градоначалникот Бобан Стефковски заедно со генералниот секретар на Фудбалската федерација на Македонија, Леонид Јандреоски, ги поздравија присутните девојчиња, кои со својата енергија, насмевки и ентузијазам покажаа дека љубовта кон спортот не познава граници.
На настанот учествуваа 60 девојчиња на возраст од 8 до 10 години, од повеќе основни училишта на територијата на Општина Гази Баба – 60 млади надежи, 60 нови приказни и можеби идни фудбалски шампионки!
Веруваме дека спортот е многу повеќе од игра. Тој е училиште за животот, каде што се учат дисциплина, тимска работа, храброст, упорност и почит. Преку спортот, девојчињата градат самодоверба, учат да веруваат во себе и сфаќаат дека со посветеност и труд можат да ги остварат своите соништа.
Женскиот спорт заслужува еднакви можности, поддршка и видливост! Секое девојче треба да има можност да тренира, да се натпреварува, да сонува големи соништа и рамноправно да го заземе своето место на спортските терени.
Нашата порака е јасна: НЕМА МАШКИ И ЖЕНСКИ СОНИШТА – ИМА САМО СОНИШТА ЗА КОИ ВРЕДИ ДА СЕ БОРИМЕ!
Општина Гази Баба ќе продолжи да ги поддржува иницијативите што ги поттикнуваат младите да спортуваат, да се развиваат и да веруваат во сопствените можности, затоа што вложувањето во децата и спортот е вложување во подобра иднина за сите нас.
Денес првите фудбалски чекори, утре големи победи! А најважно од сè – секое девојче да знае дека има право да сонува, да верува и да победува!
