Јавен повик за финансиска поддршка за организација на Европска недела на мобилноста за 2023 година

Врз основа на член 22 став (1) точка 3 и член 62 став (1) од Законот за локалната самоуправа (“Службен весник на РМ” бр.5/02) и член 151 став (2) од Деловникот на Советот на Oпштина Гази Баба (”Службен гласник на Oпштина Гази Баба” бр.4/06 и 12/13), во согласност со Програмата за заштита на животната средина и природата  на Општина Гази Баба за 2023 година (”Службен гласник на Oпштина Гази Баба” бр.14/22), Градоначалникот на општина Гази Баба објавува :

Јавен повик

за финансиска поддршка за организација на Европска недела на мобилноста за 2023 година

1. Краток опис

Средствата од Буџетот на Општина Гази Баба ќе се користат за организирање на  Европската недела на мобилност. Активностите кои ќе се организираат во рамките на неделата треба да одговорат на следната тема: Движи се рационално, штеди енергија. Активностите треба да имаат за цел подигање на јавната свест за користење на различни аспекти на движење (мобилност), да се промовираат иновативни сообраќајни решенија, со што ќе се намали употребата на автомобили, ќе се редуцираат емисиите на штетни гасови во воздухот.

Во рамките на организацијата на програмските активности понудувачот треба:

• Да предвиди голем број на настани во период од 16 до 22 Септември (работилници, предавања, промоции, манифестации и случувања) со различни содржини, учесници и организатори, кои ќе бидат во насока на темата на овогодинешната манифестација,
• Да го обмисли завршниот дел на манифестацијата – Денот без автомобили и дефилето на велосипеди.

Предвидените активности треба да бидат иновативни, соодветни на темата, инспиративни, да обезбедат масовно присуство на граѓани од сите возрасти, да бидат едукативни, забавни, интересни, со еден збор седмицата во која традиционално се одржува Европска Недела на Мобилност (16-22.09) да биде исполнета со голем број на различни настани.

Како засегнати страни во организирањето на настаните можат да бидат: градинките, основните училишта, граѓаните на општина Гази Баба и други.

2. Вкупно предвидени средства

За финансирање на понудените програмски активности, согласно овој повик, ќе се користат средствата на Буџетот на Општина Гази Баба за 2023 година од потпрограмата Р1, Трансфери до невладини организации, во вкупен износ од    200.000,00 денари.

Општина Гази Баба со претставникот на најдобрата понуда ќе склучи Договор за организација на “Европската недела на мобилноста за 2023 година“.

Средствата ќе бидат исплатени по потпишување на договорот, и тоа 50% по потпишување на договорот и 50% по доставување извештајот за реализација на манифестацијата.

Општината го задржува правото да не ги исплати сите финансиски средства доколку не се исполнети условите за доделување на финансиски средства согласно Правилникот.

3. Временска рамка

Краен рок за реализација на проектот е 22 Септември 2023 година. Рокот за доставување на Извештајот за реализација на проектот е 15 Октомври 2023 година.

4. Основни организиациски критериуми

Основни организациски критериуми кои треба да ги исполнуваат здруженијата на граѓани и фондации кои учествуваат на овој повик се:

• Да се регистрирани според Законот за здруженија на граѓани и фондации со седиште во Скопје;
• Да ги подмириле своите даночни обврски;
• Да се занимаваат со активности и проекти од јавен интерес;
• Да не добиле средства или поднеле пријава од/до друг орган на државната управа или други извори за иста намена и активности за кои поднесуваат пријава, а што би значело двојно финансирање на истите активности од различни извори.

5. Проценка на квалитетот на проектите

Проценката на квалитетот на проектите на заинтересираните апликанти кои ги исполнуваат основните организациски критериуми, ќе се врши врз основа на критериуми, достапни со пријавата. Изборот на најдобрите предлог проекти ќе го изврши Комисија формирана од Градоначалник на општина Гази Баба.

Проценката на квалитет ќе се врши согласно:

• Корелација на активностите со темата,
• Понудени активности за реализација на Европската недела на мобилноста,
• Детално разработени програмски активности,
• Искуство на организацијата во спроведување на проекти од ваков обем и област

6. Задолжителна документација за аплицирање

Здруженијата и фондациите кои учествуваат на огласот треба да достават:

Покрај пријавата која што треба да биде пополнета (дигитално со печатни букви на кирилично писмо), потпишана од надлежното лице и заверена со печат на здружението, фондацијата, трговското друштво, установата или маркетинг агенцијата апликантот задолжително треба да ги достави следниве прилози:

• Тековна состојба од Централен Регистар или Решение за регистрација на здружение или фондација;
• Потпишана изјава за подмирени обврски кон општина Гази Баба (данок, комунална такса);
• Потврда дека нема забрана за учество во постапки за јавен повик,доделување на оговори за јавна набавка и договори за јавно приватно партнерство (централен регистар);
• Дигитално пополнет предлог проект со печатни букви на кирилично писмо;
• Професионална биографија на стручните лица кои ќе бидат ангажирани во реализација на проектот;
• Референтна листа или доказ (на пример: потпишан договор) за најмалку 2 проекти реализирани во областа за која што се аплицира
• Најмалку две мислења/референци од партнери или донатори за реализација на претходни проекти и
• Писмена поддршка и преддоговор од други организации или институции за кои е ланирано да земат учество во реализацијата на проектот.

Напомена: Пријавите со непотполна документација или кои што ќе бидат доставени по стекот на предвидениот рок нема да се разгледуваат! Доставените прилози не се враќаат.

7. Начин на спроведување на јавниот повик

За спроведување на Јавниот повик Градоначалникот со Решение формира Комисија.

Комисијата е должна да изврши увид во пристигнатите предлог проекти, да изврши оценка на проектите врз основа на критериумите дефинирани согласно Јавниот повик и  да достави предлог за склучување на договор со здруженијата на граѓани и фондации чии проекти се најдобро оценети до Градоначалникот.

8. Рокот и начин на доставување на пријавите

Бараните документи треба да се пополнети на македонски јазик и достават во печатена форма, и електронска форма на УСБ во PDF формат, до Архива на општина Гази Баба, ул. Архимедова бр.2, најдоцна до 07.08.2023 година.

Електронската верзија на докуметацијата треба да се достави и на следната e-mail адреса: Nikola.Jovanovski@gazibaba.gov.mk.

Пријавата со целокупната документација треба да се достави во затворен коверт на адреса:

Општина Гази Баба – Скопје, Сектор за заштита на животната средина и природата, ул. “Архимедова“ бр.2, 1000 Скопје (со назнака – Сектор за заштита на животната средина и природата – Пријава за финансиска поддршка за организација на Европска недела на мобилноста за 2023 година).

Апликантите на јавниот повик ќе бидат известени за резултатите во рок од 10 дена од денот на објавување на Јавниот повик.

Пријавата за финансиска поддршка, критериумите за избор и финансиската конструкција се достапни во просториите на општина Гази Баба, Сектор за заштита на животната средина и природата, барака бр.2, секој работен ден од 9.00 до 16.00 часот и на интернет страната на општина Гази Баба – www.gazibaba.gov.mk .

Прашања за појаснување може да се поставуваат по електронски пат до Сектор за заштита на животната средина и природата на  e-mail адреса: Nikola.Jovanovski@gazibaba.gov.mk.

Линковите од документацијата се во прилог, а може да ги превземете подолу:

Пријава за ЕНМ 2023