ЈАВЕН ПОВИК за користење финансиски средства од Буџетот на Општина Гази Баба за надоместување на дел од трошоците на граѓаните на подрачјето на Општина Гази Баба за набавка на пелети за 2026 година
Врз основа на член 50 став (1) точка 4 од Законот за локалната самоуправа (”Службен весник на РМ” бр.5/02 и ”Службен весник на РСМ” бр.202/24), точка 2 од Програмата за заштита на животната средина и природата на Општина Гази Баба за 2026 година (”Службен гласник на Општина Гази Баба” бр.22/25) и Одлуката за користење на финасиски средства од Буџетот на Општина Гази Баба за надоместување на дел од троѓоците на граѓаните на подрачје на Општина Гази Баба за набавка на пелети (Службен Гласник на Општина Гази Баба бр.1/26), Градоначалникот на Општина Гази Баба објавува
ЈАВЕН ПОВИК
за користење финансиски средства од Буџетот на Општина Гази Баба за надоместување на дел од трошоците на граѓаните на подрачјето на Општина Гази Баба за набавка на пелети за 2026 година
- Опис на Јавниот повик
Предмет на јавниот повик е надоместување до 30% од трошоците за набавка на пелети за 2026 година, но не повеќе од 15.000,00 денари со вклучен персонален данок на доход.
Средствата се обезбедени согласно Програмата за заштита на животната средина и природата на Општина Гази Баба за 2026 година (”Службен гласник на Општина Гази Баба” бр.22/25), во Буџетот на Општина Гази Баба за 2026 година.
Ќе бидат надоместувани дел од трошоците за набавка на пелети за 2026 година од денот на објавување на овој јавен повик.
Јавниот повик ќе трае од денот на објавувањето до 30.11.2026 година, односно сѐ до исцрпување на финансиски средства наменети за оваа намена од Буџетот на Општина Гази Баба за 2026 година.
Јавниот повик е објавен на web страната на Гази Баба (www.gazibaba.gov.mk), и во два печатени медиуми.
- Право на учество на Јавниот повик:
Право на учество на јавниот повик имаат жителите на Општина Гази Баба кои ќе набават пелети во периодот од денот на објавување на јавниот повик сѐ до исцрпување на финансиските средства наменети за оваа намена од тековниот Буџетот на Општина Гази Баба, но не подоцна од 30 ноември во тековната година, кои ќе ја достават потребната документација и кои ќе ги исполнат условите на оваа Одлука.
На Јавниот повик немаат право на учество жителите (домаќинствата) кои не се корисници и не поседуваат уред на пелети (печка/котел на пелети), жителите (домаќинствата) кои имаат станбен објект во фаза на градба и не живеат во истиот како и жителите кои ги немаат подмирено обврските по основ на данок на имот за станбениот објект во кој се наоѓа уредот на пелети.
- Услови што треба да ги исполни барателот:
Барателот треба да ги исполни следните услови:
- да е жител на Општина Гази Баба,
- да поседува уред на пелети (печка/котел на пелети),
- да нема приклучок на системот за централно греење,
- да ги има подмирено обврските по основ на данок на имот за станбениот објект во кој се наоѓа уредот на пелети
- да поседува оригинален доказ дека е извршена набавката на пелети во тековната година од датум на објавување на Јавниот повик и тоа со:
- фискална сметка или
- фактура со прилог уплатница или
- фактура со прилог извод од деловна банка за извршена уплата во целост,
- да достави фотографија од уредот на пелети,
- да достави изјава заверана на нотар дека се работи за индивидуален објект кој не е поврзан на системот за централно греење, за кој досега нема искористено субвенции за набавка на пелети од Општина Гази Баба и поседува уред на пелети за истиот објект,
- да достави барање за издавање потврда за подмирени обврски по основ на данок на имот за станбениот објект.
Напомена: “Барателот мора да ги исполнува сите горенаведени услови за да неговото барање биде одобрено. Во спротивно, неговото барање ќе биде одбиено“.
- Начин на пријавување на Јавниот повик
За надоместување на дел од трошоците и докажување дека условите се исполнети, барателот до Општина Гази Баба треба да достави:
- Пополнето барање, кое може да се подигне од архивата на Општина Гази Баба или да се обезбеди преку интернет страната на Општината(gazibaba.gov.mk),
- фотографија од печката/ котелот на пелети кој го користи,
- нотарски заверена изјава дека се работи за индивидуален објект кој не е поврзан на системот за централно греење, за кој досега нема искористено субвенции за набавка на пелети од Општина Гази Баба и поседува уред на пелети за истиот објект(gazibaba.gov.mk),
- оригинален доказ дека е извршено купување на пелети во 2026 година од денот на објавување на Јавниот повик, и тоа со фискална сметка или фактура со прилог уплатница или фактура со прилог извод од деловна банка за извршена уплата во целост,
- трансакциска сметка исклучиво лична на барателот (не ополномоштена од трето лице),
- барање за издавање потврда за подмирени обврски по основ на данок на имот за станбениот објект за каде што се набавени пелетите заклучно со 2025 година, (барањето може да се подигне во архивата на Општина Гази Баба или да се обезбеди од интернет страницата на општината (gazibaba.gov.mk).
- Доколку има повеќе домаќинства кои живеат на иста адреса задолжително треба да достават сметки од различни броила за електрична енергија како доказ дека се посебно одвоени домаќинства.
Барателот треба да го достави барањето и документацијата во прилог во затворен плик до „Комисија за спроведување на постапката за субвенционирање на граѓаните на подрачјето на Општина Гази Баба за набавка на пелети за 2026 година“ во архивата на Општина Гази Баба, на адреса ул.Архимедова бр.2, секој работен ден од 07:30 до 16:30 часот.
Архивата на Општина Гази Баба примените барања ќе ги евидентира со точното време на поднесување (датум, час и минута), заради воспоставување редослед по кој ќе се разгледуваат барањата.
- Начин на спроведување на јавниот повик
- Градоначалникот на Општина Гази Баба формира Комисија за спроведување на Јавниот повик која ќе ја спроведе постапката во две фази:
- во првата фаза ќе ги разгледа пристигнатите барања и документацијата во прилог со цел да утврди дали истите се уредни и комплетни и
- во втората фаза ќе изврши теренски увид кај сите баратели кои имаат доставено уредна и комплетна документација за да утврди дека ги исполниле условите од овој Јавен повик, а особено дека се корисници на уред на пелети во живеалиштето според личната карта на барателот и дека станбениот објект не е во фаза на градба и во него барателот живее.
Исплатата на одобрените средства ќе се врши сукцесивно, според редот на пристигнати барања по принципот „прв дојден прв услужен“, а по донесување на решенија за одобрување на барањата од страна на градоначалникот на Општина Гази Баба.
- Начин на остварување на правото на надоместок
За утврдување на исполнувањето на условите согласно точка 3 на јавниот повик, Градоначалникот на општина Гази Баба формира Комисија за спроведување на постапката за субвенционирање на дел од трошоците за купување на пелети, за граѓаните на подрачјето на Општина Гази Баба за 2026 година.
Градоначалникот на општина Гази Баба на предлог на Комисијата ќе донесе решение за усвојување на барањето на барателите кои ги исполниле условите врз основа на Јавниот повик.
Градоначалникот на општина Гази Баба на предлог на Комисијата ќе ги извести за неусвојување на барањето, барателите кои не ги исполниле условите врз основа на Јавниот повик.